Laboratori: gjenars di file, atribûts, tabele e interogazions

Chest al è un laboratori par mostrâ cemût doprâ i Atribûts, lis Interogazions, la Tabele e i Gjenars di file personalizâts. Come esempli, o costruìn une base di dâts par tignî note de nestre scansie di DVDs.

Preparazions

Prime di dut o decidarìn ce gjenar di file e cuâl atribût nus pues coventâ pal nestri lavôr. In origjin, o vevi planificât di doprâ un file-segnelibri cuntun colegament ae pagjine IMdB dal filmât, ma viodût che chê volte Haiku nol veve un navigadôr cui segnelibris come il NetPositive di BeOS, mi soi inventât chê robe achì: il stes file al sarà une imagjin JPEG pe cuvierte dal filmât.
Cun WebPositive, Haiku cumò al à di gnûf un navigadôr che al dopre i files-segnelibris, duncje tu puedis ancje doprâ un file-segnelibri invezit di une imagjin come gjenar di file di base pai nestris files de base di dâts.
Dut câs, a chescj files o zontìn un pâr di atribûts. Chi o vin di decidi se o desiderìn interogâju plui indenant (alore o vin di zontâju ae tabele) e in câs, ce gjenar di atribût che al à di sei. I numars (int, float) a puedin jessi valutâts in maniere diferente rispiet al test (</=/> vs. is/contains/starts with).

Chi a son i atribûts che o desideri viodi pai miei DVDs:

Titul dal film
Gjenar
URL a p.e. IMdB
Regjist/Atôrs
Trame
Mê valutazion di 1 a 10
Coordenadis te mê scansie, p.e. A2, B3, cussì o cjati il DVD ancje te vite reâl :)
Tal câs, a cui che o ai prestât il disc...

Creâ un gjenar di file personalizât

Invie lis preferencis dai Gjenars di file e fâs clic sul boton Zonte... sot de liste jerarchiche a çampe. Si vierç un piçul dialic e tu specifichis in cuâl Grup MIME al à di stâ il to gnûf gjenar di file. Tu puedis ancje creâ un grup gnûf dal dut. Metìnlu in "applications" e met "Non interni" tant che DVDdb.

Cumò, si vierç un panel pal to gnûf gjenar di file DVDdb:

Icone

Fâs dopli clic sul ricuadri de icone par vierzi Icon-O-Matic cussì di dissegnâ une icone pal to gjenar di file. Tu puedis ancje strissinâ e molâ une icone che si cjate tal ricuadri de icone di un altri gjenar di file, magari come inizi par une version modificade.

Ricognossiment dal file

Tu puedis zontâ sufìs come .txt, .jpg, .mp3 par ricognossi i files midiant la lôr estension. Util cuant che si lavore cui files di altris sistemis cence i gjenars MIME. Pal nestri esempli no vin bisugne di chest.

Descrizion

Non dal gjenar - Al ven fûr p.e. tal menù "Atribûts" dai barcons Tracker e l'atribût "Gjenar" di un file.
Descrizion - Une descrizion un tic plui detaiade.

Aplicazion preferide

Chest menù a tende al mostre une liste di dutis lis aplicazions che a puedin gjestî chest particolâr gjenar di file. Di chi tu puedis sielzi cuâl program al à di vierzi chest specific file cuant che al ricêf il dopli clic.

Selezione...		al vierç un dialic dai files dulà che tu sielzis la aplicazion di vierzi cun chest gjenar di file. Chi o configurìn ShowImage par visualizâ la cuvierte dal DVD.
Il stes di...		al vierç un dialic dai files dulà che tu sielzis cualsisei file che al à za configurade la aplicazion preferide che tu stâs cirint.

Atribûts adizionâi

Chi o inserìn ducj i atribûts personalizâts che o vin decidût tai nestris preparatîfs. Fasint clic sul boton Zonte... si vierç un panel par inserî ducj i dâts pal gnûf atribût. Tu puedis modificâ un atribût esistent cuntun dopli-clic.

Non atribût - Al ven fûr p.e. come intestazion di colone tai barcons di Tracker.
Non interni - Al ven doprât pe tabele e par interogâ l'atribût.
Gjenar - Al definìs il valôr che l'atribût al à di tignî e duncje cemût che al pues jessi interogât.
- Stringhe pal test normâl
- Boolean pai dâts binaris: 0 (fals) o >=1 (vêr)
- Intîr pai numars intîrs cun intervai diferents:
  - 8 bit: di -128 a 127
  - 16 bit: di -32.768 a 32.767
  - 32 bit: di -2.147.483.648 a 2.147.483.647
  - 64 bit: di -9.223.372.036.854.775.808 a 9.223.372.036.854.775.807
- Numar in virgule mobile pai numars in virgule mobile a singule precision
- Numar in virgule mobile a dople precision pai numars in virgule mobile a dople precision
- Timp pal formât date e ore

Visibil - Cheste casele di selezion e determine se l'atribût al è visibil dal dut intun barcon di Tracker. Viodût che il Tracker al sarà la interface pe nestre base di dâts dai DVDs, o vin di segnâle e definî il so aspiet cun:
- Mostre come - Lasse su "Predefinît" se si à di visualizâ i valôrs in base al "Gjenar" dal atribût (p.e. stringhe/intîr/virgule mobile e v.i.). Lis altris opzions a son:
  - Casele di selezion - Tu puedis doprâlu par mostrâ un di doi simbui, viôt Speciâl chi sot.
  - Durade - Al mostre un intîr tant che 1/60, p.e. "90" al devente "1:30".
  - Valutazion - Al mostre une valutazion tra 0 e 10 come stelutis.
- Modificabil - Al determine se al è pussibil modificâ l'atribût in Tracker.
- Speciâl - Al definìs i doi simbui doprâts par une visualizazion di casele di selezion. Par esempli, "xo" al mostrarà une "x" par ducj i valôrs >0 e "o" par 0.
- Largjece - La largjece predefinide de colone di chel atribût intai barcons Tracker.
- Inliniament - Al è pussibil visualizâ l'atribût inliniât a çampe, tal mieç e a drete.

Cumò, o inserìn dutis lis informazions pai nestris atribûts:

Non interni	Gjenar di atribût	te tabele?	Descrizion
DVDdb:titul	test	sì	Titul dal film
DVDdb:gjenar	test	sì	Gjenar
DVDdb:url	test	no	URL
DVDdb:atôrs	test	sì	Regjist/Atôrs
DVDdb:trame	test	no	Trame
DVDdb:valutazion	intîr-32	sì	Valutazion di 1 a 10
DVDdb:coordenade	test	no	Scansie
DVDdb:prestât	test	sì	Prestât a

Meti te tabele

Prime di scomençâ a inserî i dâts te nestre piçule base di dâts dai DVDs, o vin di zontâ cierts atribûts ae Tabele. Dome i atribûts metûts te tabele a puedin doprâ lis sveltis Interogazions di Haiku.
Duncje, ce cirarìno un doman? Probabilmentri no domandarìn "Ce isal te coordenade B4 te mê scansie?" o "L'URL dal IMdB o la trame dal film contegnino la peraule 'pape-shenouda'?".

Chest nus lasse chescj atribûts:

Non interni	Gjenar di atribût
DVDdb:titul	test
DVDdb:gjenar	test
DVDdb:atôrs	test
DVDdb:valutazion	intîr-32

Par metiju te tabele, o vierzìn un Terminâl e semplicementri o zontìn par ordin i atribûts:

mkindex -t string DVDdb:titul
mkindex -t string DVDdb:gjenar
mkindex -t string DVDdb:atôrs
mkindex -t int DVDdb:valutazion

La opzion -t e definìs il gjenar di atribût, che al è par ducj "string" (stringhe) infûr di valutazion, che al è un numar intîr.

Jemplâ cui dâts

Cumò, dut al è stât configurât e o podìn scomençâ a meti cualchi dât te nestre base di dâts.
Viodût che il nestri file di base al è une imagjin di cuvierte, o nin su cualchi risorse in rêt come IMdB, o cirìn il nestri prin film e o salvìn la cuvierte o il poster dal filmât intune gnove cartele, dulà che o desiderìn tignî i nestris files DVDdb.

Vierzint chê cartele o viodìn un tipic barcon di Tracker cuntun JPEG dentri. Fasint clic diestri su di lui, o cambìn il so gjenar di file a application/DVDdb cul Component adizionâl Gjenar di file. Tu âs plui informazions in merit tal document Gjenars di file.

Cumò, o ativìn ducj i nestris atribûts DVDdb dal menù Atribûts dal barcon di Tracker e o metìn in ordin daûr dal nestri gust:

Fasint clic suntun atribût ancjemò vueit (o fracant ALT E) o jentrìn in modalitât modifiche e o jemplìn ducj i atribûts. Cun TAB e MAIUSC TAB tu puedis passâ di un atribût a chel altri.

Tal nestri esempli, o scomencìn di solit cuntune cuvierte JPEG discjariade e o cambìn il so gjenar a applications/DVDdb. E je une altre maniere elegante par produsi un file e lavorâi sore. Al baste copiâ un file vueit dal nestri gjenar di file su /boot/home/config/settings/Tracker/Tracker New Templates e cambiâi non in DVDdb.

Fasint clic diestri intun barcon di Tracker, tu cjatarâs une gnove vôs sot di Gnûf... dopo dal predefinît "Gnove cartele".

Interogâ la base di dâts

Diviersis oris di dûr lavôr dopo, o vin une ninine base di dâts che tu puedis interogâ par cjatâ ducj i tiei films di Christina Ricci che a àn une valutazion di 7+... :)

Tu puedis assegnâ un scheme sensât pe disposizion dai atribûts tai risultâts des interogazions di un specific gjenar di file.
Vierç la cartele che e conten i tiei files DVDdb e met in ordin i atribûts come che ti plâs vê presentâts i risultâts des interogazions. Copie cheste disposizion cun Atribûts | Copie disposizion.

Vierç /boot/home/config/settings/Tracker/DefaultQueryTemplates, cree une gnove cartele e clamile group/filetype, sostituint lis sbaris cun liniutis bassis; tal nestri câs "application_DVDdb".

Vierç la gnove cartele e tache dentri la disposizion cun Atribûts | Tache disposizion. Voilà: