Tabele

Riproduzion audio e video Lis listis di riproduzion Valutazions Impostazions Controi di tastiere

MediaPlayer

Deskbar:		Applications
Posizion:		/boot/system/apps/MediaPlayer
Impostazions:		~/config/settings/MediaPlayer

MediaPlayer al è il riprodutôr multimediâl predefinît par ducj i file audio e video. In graciis dal backend ffmpeg, a son supuartâts une sdrume di formâts di chei plui doprâts. La sô interface semplice e à ducj i controi che un si spiete:

Il cursôr de sbare di avanzament ti permet di lâ daurman intune posizion, lassant il mouse parsore de sbare ti mostrarà il timp atuâl e trop che al reste dal videoclip o de musiche. Fasint clic sul timp ae sô diestre, chest timp al cambie tra lungjece, timp atuâl e timp che al reste.
Sot di chel tu cjatis i solits controi par saltâ al toc precedent, riproduzion/pause, ferme e salte al prossim toc. Dopo al rive un control dal volum (fasint clic sul simbul de casse sonore al comunte il cidinâ) e un misuradôr di VU (Unitât di Volum).

Riproduzion audio e video

Viodût che no je nissune funzionalitât specifiche pe riproduzion audio, o larin drets aes funzionalitâts video o gjenerâls.

Al è disponibil par dutis lis sorzints multimediâls Informazions sul file... (ALT I). Chest al mostre informazions sul file che al è cumò cjariât, come par esempli la durade o i detais de linie audio/video e il so codec.

La plui part dai comants doprâts tai menù a son ancje disponibii cul menù contestuâl dal clic-diestri inte aree dai videos. Util cuant che si è in modalitât plen visôr.
Sot di Video tu cjatarâs lis opzions par ingrandî il barcon a varis nivei o sfuarçâ lis proporzions a caulchi valôr standard. Lassant lis proporzions al valôr predefinît Impostazions dal flus al varès di funzionâ in maniere otimâl pai file codificâts in maniere juste.

MediaPlayer al supuarte i sottituis in formât SRT. Par viodiju sot de vôs Sottitui, il lôr non di file al à di jessi compagn di chel dal file video, cuntun sufìs cul non de lenghe e ".srt" al puest de estension dal video. Par esempli:

MyMovie.avi
MyMovie.Deutsch.srt
MyMovie.English.srt
MyMovie.Français.srt
MyMovie.Furlan.srt

Dal sot-menù Linie audio a puedin jessi disponibilis plui liniis audio, dispès dopradis par vê plui lenghis intun file video sôl. Il sot-menù Video | Linie al da lis stessi pussibilitâts cuant che si à disponibii plui flus video.

Tu puedis comutâ la modalitât Plen visôr (ALT INVIE o F o un dopli clic di çampe), platâ i ôrs dal barcon di MediaPlayer e i controi cun Plate interface (ALT H o un dopli clic di dieste) o have it's window Always on top (ALT A).

Lis listis di riproduzion

MediaPlayer | Liste di riproduzion... (ALT P) al vierç un barcon cui file che a son cumò in code pe riproduzion. Fasint dopli clic suntune vôs MediaPlayer al tacarà a riprodusile.

Tu puedis zontâ plui file se tu ju molis inte liste e tu justis la lôr posizion cul strissine-e-mole. I gnûfs files a vegnin zontâts par ordin di selezion cussì come che e je stade fate tal barcon di Tracker. Se tu ju strissinis e molis cul boton di diestre al vignarà mostrât un menù contestuâl par inserîju ordenâts (in maniere alfabetiche).
Dal menù Modifiche tu puedis fâ Rangje a câs o Gjave (DEL) suntune vôs de liste o eliminâ il file curint cun Sposte file te Scovacere (ALT T).

Logjic, tu puedis fâ Salve suntune playlist e plui indenant fâ Vierç par tornâle a vierzi, opûr fâle partî fasint un sepliç dopli clic sul file de liste di riproduzion.

Valutazions

Chi tu puedis stabilî une Valutazion dal element multimediâl corint, cun valôr tra 1 e 10, opûr sielzi Azere valutazion par tornâ a metilu a "cence valutazion" (= "0").

In Tracker, lis valutazions a vegnin visualizadis come numar di stelis intune colone dai atribûts clamade "Rating". Cinc stelis a rapresentin i 10 valôrs pussibii, cun passaçs di miezis stelis. Par esempli, une valutazion di 7 e ven mostrade come 7 / 2 = 3.5 stelis: ★★★⯪☆.
Tu puedis modificâ la valutazion ancje dal Tracker: selezione il file, sielç Modifiche non dal menù File e frache TAB par lâ ae colone "Rating". Cumò tu puedis inserî il gnûf valôr numeric che al deventarà une valutazion in stelis dopo vê fracât INVIE.

Impostazions

A son diviersis impostazins par regolâ cun precision il compuartament di MediaPlayer:

Il prin lot, Modalitât di riproduzion, si spieghe di bessôl.
Scomençâ la riproduzion in automatic, sierâ i barcons cuant che si finìs o riprodusi i file multimediâi in mût ciclic.
Dal menù a tende tu sielzis ce mût che al à di compuartâsi MediaPlayer cuant che si invie. Se al à di ripiâ di dulà che si jere fermât la ultime volte met simpri, opûr par fâ in mût che al domandi: domande ogni volte.

Dopo si à diferentis Opzions di visualizazion.
Tu puedis sielzi se ativâ Dopre soreposizions video in hardware, se disponibilis, che al sbasse la utilizazion de CPU, ma al funzione dome par un sôl barcon video e al à bisugne di un driver di schede video supuartade.
Tu puedis ativâ Scjale i filmâts in mût fluit (cuant che no si è in modalitât soreposizion) che al dopre un filtri une vore svelt par smussâ i pixel che se no a semein blocs cuant che si aumente l'ingrandiment o si viôt a plen visôr.
Ridimensione controi in modalitât plen visôr se tu preferissis controi un pêl plui grancj, magari parcè che tu viodis il schermi di un pêl plui lontan cuant che tu sês in modalitât plen visôr.
Dopo si à lis impostazions pe Dimension dai sottitui e Plaçament dai sottitui. I sottitui a puedin jessi mostrât te Part inferiôr dal video, che ju varà simpri soreponûts ae imagjin. O Part inferiôr dal visôr, che invezit ti permet di ridimensionâ il barcon in verticâl e vê visibii i sottitui te striche nere in bas.

Lis ultimis impostazions a determinin il volum des riproduzions di chei barcons che no son atîfs in chel moment. Tu puedis vêlis che a inçontenedin al Volum massim, che a fasedin mancul confusion cun Volum bas o che e stedin cuietis cun Cidinât.

Controi di tastiere

MediaPlayer al ufrìs cumbinazions di tascj utilis par controlâ la riproduzion cence doprâ il mouse.

Z		Salte al toc precedent
X		Riprodûs
C		Met in pause
V		Ferme
B		Salte al prossim toc

Chescj tascj a vegnin assegnâts aes funzions dai botons di control. A son simpri i tascj des letaris in bas a çampe de tastiere, cioè a son indipendents de mapadure di tastiere che si dopre. I tascj chi parsore a corispuindin ae mape de tastiere amerecane dai Stâts Unîts.

← / →		Cîr indaûr/indenant
MAIUSC ← / →		Salte indaûr/indenant di 10 seconts
ALT ← / →		Salte indaûr/indenant di 30 seconts
↓ / ↑		Sbasse/Alce volum
ALT ↓ / ↑		Va al prossim/precedent toc/linie
Sbare di spazi		Comute riproduzion/pause
ALT INVIE		Comute modalitât plen visôr (fat ancje cun dopli clic di çampe inte aree dal video o fracant F o TAB)
ALT MAIUSC 0 / 1 / 2 / 3		Al cambie lis proporzions a Impostazions dal flus (ce mût che al è stât codificât il video), Nissune corezion dal aspiet (al mape i pixel dal video in rapuart 1:1 cul schermi), 4:3, 16:9