Aplicazions

Prime di aprofondî dutis lis aplicazions che a rivin cun Haiku, viodin par ben ce mût che si instale e disinstale i programs. La maniere plui conveniente par cjatâ, instalâ, inzornâ e disinstalâ lis aplicazions e je par mieç dal sisteme di gjestion dai pachets di Haiku. Dut câs, viodût che Haiku al è pe plui part compatibil cui sorzints e cui file binaris al so antenât BeOS, tu podaressis cjatâ archivis vecjos (.zip e .pkg) che si puedin ancjemò instalâ.

Chi sot tu cjatarâs simpri ricuardade la gjerarchie /system/. Se tu intindis instalâ i pachets dome par un singul utent (une volte che Haiku al devente multi-utent a ducj i efiets), tu varessis di doprâ la gjerarchie dal filesystem spielât sot di home: ~/config/. Viôt l'argoment Disposizion dal filesystem par vê plui informazions.

Pachets di Haiku (.hpkg)

La maniere plui semplice e je chê di doprâ HaikuDepot par cjatâ, discjariâ e instalâ in automatic e disinstalâ un pachet. Se tu âs discjariât un pachet di cualchi altre bande — forsit parcè che nol è (ancjemò) intun dipuesit public — al baste fâ dopli clic par vierzilu in HaikuDepot e di lì instalâlu.

Tu cjatarâs la gnove aplicazion instalade in /system/apps/ o, tal câs di une aplicazion a rie di comant, in /system/bin/. Ducj i altris file che su chei al dipent il program (librariis, dâts, zontis, e vie indenant) a vegnin fûr in automatic te justis posizions tal filesystem.

I argoments Deskbar o LaunchBox a descrivin ce mût zontâ scurtis ae gnove aplicazion instalade.

A proposit, aben che tu puedis estrai un file .hpkg come ogni altri archivi, chest nol è ce che il gjestôr dai pachets al fâs cuant che tu instalis un pachet. Il filesystem che al sta sot al ven fûr dome par sparniçâ i file intes lôr relativis cartelis, nissun spostament fisic al ven fat. Chest al è il motîf che al fâs deventâ veloe e nete la instalazion/disinstalazion.

Se il pachet al dipent di cualchi altre librarie o pachet, un barcon al comparirà, domandant se ancje i file necessaris a àn di jessi discjariâts e instalâts.

Disinstalâ al è facil cussì: al base cjatâ il pachet in HaikuDepot e fâ clic su Disinstale.

Se tu stâs lavorant intal Terminâl o tu desideris eseguî dis/instalazions di pachets intun script, tu varessis di butâ un voli al comant pkgman --help.

Archivis BeOS vecjos (.zip e .pkg)

I archivis di BeOS, che a includin dut ce che ur covente inte lôr cartele de aplicazion, a puedin jessi estrats semplicementri (fasint dopli clic si vierç Espansôr o il vecjo InstaladôrPachets) dulà che si vûl in /boot/home/ e eseguî di lì. Disinstalâ chês aplicazions auto-contignudis al è facil: al baste eliminâ la cartele de aplicazion.

Chest al è vêr pe plui part des aplicazions di BeOS vecjis. Se ti capite une che no funzione cussì, parcè che e vûl sparniçâ i siei file in posizions fissis che nol è dite che a esistedin, tu puedis provâ a comedâ lis robis a man. La cartele /system/non-packaged/ ti permet di tornâ a creâ la gjerarchie des cartelis che ti coventin. A man a man che i pachets .hpkg reâi a deventin disponibii e lis aplicazions di BeOS vecjis a vegnin tornadis a impachetâ, chest al deventarà simpri mancul necessari. Par plasê consulte chest articul in rêt su ce mût doprâ la gjerarchie non-packaged.

Aplicazions di Haiku

Haiku al rive cuntune schirie di aplicazions, pe plui part des voltis piçulis ma essenziâls. Tu lis cjatarâs dutis su /boot/system/apps/. Lis aplicazions che di solit no son inviadis di un dopli clic suntun file di dâts (p.e. MostreImagjin pai file imagjin) a puedin jessi cjatâts intal menù dal Deskbar Applications.

	VisôrAtivitâts		Un strument par tignî di voli lis risorsis di sisteme come CPU e memorie doprade.
	Gjestôr di inviament		Un strument par instalâ un menù di inviament intal Master Boot Record (MBR) di une unitât.
	Mape caratars		Une aplicazion che e mostre la mape dai caratars Unicode.
	CodyCam		Un strument par mandâ in maniere regolâr lis imagjins di une webcam suntun servidôr.
	Debugger		Un debugger grafic.
	DeskCalc		Une calcoladorie.
	Scandai dal disc		Un editôr esadecimâl pai file e pai dispositîfs.
	DiskUsage		Un strument par visualizâ la memorie doprade dal disc.
	Gjestion disc		Un imprest pal partizionament dal disc fis.
	Espansôr		Un strument par estrai i archivis comuns.
	HaikuDepot		Un strument par cjatâ, discjariâ, instalâ, inzornâ e disinstalâ i pachets (aplicazions)
	Icon-O-Matic		Une aplicazion par creâ lis iconis vetoriâls di Haiku.
	Instaladôr		Un strument par instalâ Haiku suntune partizion.
	Magnify		Une vision ingrandide de aree tor ator dal pontadôr dal mouse.
	Mail		Un client e-mail.
	MediaPlayer		Un riprodutôr par ducj i file audio/video supuartâts.
	MidiPlayer		Un riprodutôr pai file MIDI.
	InstaladôrPachetsVecjos		Instaladôr pai pachets di BeOS intal formât PKG.
	People		Un gjestôr dai contats.
	Puar Om		Un sempliç servidôr web.
	Cature di schermi		Un strument par fâ istantaniis dal schermi.
	MostreImagjin		Un sempliç visualizadôr di imagjins.
	SoftwareUpdater		Un strument par inzornâ i pachets software e il stes Haiku.
	Regjistradôr di suns		Un strument par regjistrâ audio de linie di jentrade o di un microfon. [ancjemò al mancje]
	StyledEdit		Un sempliç editôr di test.
	Terminâl		Al permet di doprâ la shell bash.
	TextSearch		Un strument di ricercje pai file di test.
	TV		Un visualizadôr pes TV analogjichis. [ancjemò al mancje]
	WebPositive		Un navigadôr web natîf

Aplicazions a rie di comant di Haiku

In diplui ai struments de rie di comant normâi, che si àn cu la shell bash o che a coventin par jessi conformi al standard POSIX, e je cualchi aplicazion, a rie di comant, specifiche par Haiku che e vâl la pene di nomenâ. Chescj comants a son dispès utii par finalitâts di scripting, bute un voli ancje sul argoment Bash e Scripting.

	Liste di dutis lis aplicazions de rie di comant
	Aplicazions de rie di comant specifichis par Haiku

Aplicazions incorporadis

In diplui dai programs listâts parsore, che a son ducj mantignûts dal progjet Haiku, e je cualchi aplicazion incorporade essenziâl intun sisteme Haiku standard. Erôrs e richiestis di funzionalitâts par chei programs a scugnin jessi inviâts a chês personis in particolâr che ju mantegnin.

	BePDF		Un visualizadôr di PDF.
	Pe		Un editôr di test avanzât cu la colorazion de sintassi e tant altri.
	Vision		Un client IRC.
	WonderBrush		Program grafic di YellowBite.