Localizazion

Il sisteme di adatament locâl (localizazion) di Haiku nol inclût dome la sostituzion dai tescj cu lis traduzions, ma ancje ativitâts plui complessis come la formatazion dai numars, des datis e des oris intune forme che e corispuindi aes tôs preferencis di Localizazion.

Lenghe

Haiku al è stât voltât intun grum di lenghis, purtrop cualchi traduzion no je ancjemò completade. Par cheste reson tu puedis sielzi plui di une lenghe in “Lenghis preferidis”. Se cualchi toc al mancje intune traduzion, al ven sostituît cu lis peraulis de sucessive lenghe preferide. L'inglês e je la lenghe di repeç predefinide (ancje cuant che no je in liste).

In chest esempli, la lenghe preferide e je stade metude a Spagnûl. La prime lenghe di repeç e je il talian e se ancje lì al mancje il test, si torne ae lenghe predefinide, l'inglês.
Come che tu puedis viodi, pandint une vôs di lenghe a çampe al mostre des sot-vôs pes specifichis variantis o dialets di chê lenghe (se disponibilis).

Formatazion

Inte schede Formatazion tu puedis configurâ il formât di date, ore, numars e monede in maniere indipendente rispiet a chê de configurazion de lenghe preferide.

Tu podaressis jessi un frut spagnûl che si cjate inte part de Svuizare dulà che si cjacare par talian. Cussì, tu preferiressis vê il to sisteme par Spagnûl, ma i numars e la monede tal formât che tu dopraressis lì, là che tu lavoris: Svuizare/Talian.
Se tu ti cjatis miôr cui tiei nons spagnûi pai dîs e pai mês (pense aes datis modificadis dai file, par esempli), tu puedis passâ parsore di cheste formatazion specifiche de date cu la casele di selezion in alt Dopre nons mês/dîs de lenghe preferide.

Ancje se l'esempli parsore forsit nol è il câs plui comun, al dimostre però la flessibilitât dal sisteme.

Cheste altre opzion ti Volte i nons des aplicazions e des cartelis tal Deskbar e tal Tracker. Disative la casele di selezion se tu preferissis che la interface grafiche e sedi localizade, ma tignint i nons origjinâi (par inglês) pai panei des preferencis, pes aplicazions e pai nons standard des cartelis.

Lis modifichis a vegnin aplicadis daurman, dut câs tu varâs di sierâ e tornâ a inviâ lis aplicazion che in chel moment a son in esecuzion par fâ in mût che a mostredin lis gnovis impostazions.