Spazis di lavôr

I Spazis di lavôr a son scritoris virtuâi, complets cu la lôr risoluzion, profonditât di colôrs e fonts. Si puedin vê fin a 32 di chescj spazis di lavôr e si puedin stabilî lì des preferencis dal Schermi.

Passâ di un spazi di lavôr a chei altris

Tu passis di un spazi di lavôr a chel altri o fasint clic inte applet Spazis di lavôr (che si pues viodi te imagjin parsore) o doprant la scurte di tastiere ALT Fx, dulà che "x" al è il numar dal spazi di lavôr. No je mal pensade la idee di rangjâ i spazis di lavôr in riis di cuatri par fâ semeâ la disposizion dai tascj Fx te tastiere.
Fasint clic suntune aplicazion o un dai siei barcons tal Deskbar ti mandarà sul scritori dulà che al sta.

Une altre maniere une vore furbe e je chê di doprâ CTRL ALT ←/→/↑/↓ par navigâ pes riis/colonis dai spazis di lavôr disponibii. Se cun diplui tu tegnis fracât MAIUSC, il barcon atîf si spostarà cun te sul gnûf spazi di lavôr.

Tu puedis lâ indaûr e indenant tra doi spazis di lavôr cun ALT ` (il tast reâl al dipent de mape di tastiere che si sta doprant - al è il tast sot dal ESC). Ancje chì, tignint fracât MAIUSC al puartarà cun te ancje il barcon atîf.